Feiing og bustadtilsyn

Her finn du all info om feiing og tilsyn, logg inn inn på Min Eigedom

• Kommunen skal syte for at røykkanalar i fyringsanlegg, som blir brukt til oppvarming av byggverk, blir feia etter behov.
• Kommunen skal syte for at det, ved behov, blir ført tilsyn med fyringsanlegg som blir brukt til oppvarming av byggverk. 

Etter forskrift gjeld det alle bygningar, også fritidshus og sel.

Forskrift for brannførebygging § 17

Varsel om feiing og tilsyn vert i stor grad sendt ut som tekstmelding (SMS).

Dersom det er behov for å avtale meir nøyaktig klokkeslett, ta kontakt med feiaren (sjå tekstmeldinga).

Dersom datoen ikkje passar, ta kontakt med feiaren for ny avtale.

Dersom du er eigar av bustad og ikkje får varsel om feiing og tilsyn, kan du sjekke kva kontaktopplysningar som er registrert på norge.no

Du må vere heime når vi kjem på tilsyn, slik at du kan vise oss rundt i bustaden.

Dette kontrollerer vi:

• røykvarslarar, sløkkjeutstyr og rømningsvegar
• om eldstad og skorstein har synlege feil eller manglar
• om det er behov for feiing og om feiaren har tilgang til skorsteinen

I tillegg rettleiar vi deg i spørsmål om fyring og branntryggleik i heimen. Etter besøket får du ein tilsynsrapport.

Kan du ikkje vere til stades sjølv, bør du avtale med nokon som kan sleppe oss inn. Personen må kjenne bustaden godt.

Finn fram dokumentasjon på eldstad/ fyringsanlegg. Fekk du avvik sist vi var på feiing og tilsyn, ber vi deg dokumentere at manglane er utbetra.
 

• Etter at du har motteke varsel om feiing og svart 1 (JA) på sms må du syte for at heile fyringsanlegget (dvs. peis, eldstad, parafinomn osv.) er tilgjengeleg for feiing, samt utstyrt og innretta slik at det kan feiast på tilfredsstillande måte.
• Det vil seie at du må lukke igjen luker, spjeld og trekkventilar. Dessutan må du syte for at eldstaden er forsvarleg lukka.
• Hugs å melde frå til leigebuar.
• Dersom feiaren skal fjerne sotet frå botnen av pipa. Hugs å setje fram noko egna å ha sotet opp i, og ordne med tilkomst til sotluka.

Tilkomst til pipa:

• Set fram godkjent stige. Stigen må vere i metall. I dei tilfelle det er meir enn 5 meter frå bakke til tak må stigen vere festa med godkjent sklisikring. Stigen skal nå frå bakkenivå til cirka 1 meter over takrenna.
• Sjå til at det er stigetrinn på taket fram til skorsteinen. Er det fleire skorsteinar skal det vere montert gangbru mellom dei, eller trinn til alle skorsteinane.
• Dersom skorsteinen er over 120 centimeter høg skal den ha feieluke eller plattform.
• Alle stigar og trinn må vere montert i forhold til monteringsanvisninga.

• I Stryn kommune har det lenge vore obligatorisk feiing og tilsyn med fritidshus/ hytter som har innlagt vatn/ avløp, straum og veg. Etter kvart vil det bli innført feiing/ tilsyn på alle ferie/ fritidshus/ hytter, slik Forskrift om brannførebygging krev.

• Feiarvesenet vil sende ut ei melding med informasjon om når dei er i området, og ønskjer kontakt med eigarane for å avtale nærare tid for besøk.

• Kor ofte ein skal feie, skal vere etter behov, men som oftast er det kvart 4. år.

• På fritidshus og hytter prøver vi å foreta feiing og tilsyn på same tid. Vi treng tilgang til bygningen, og ser helst at det er eigaren som er med, men det er ikkje eit absolutt krav.